Vor 9 Johr simer s’letscht mou aus Familie mehreri Wuche/Monet ungerwägs gsi. Sithär heimer bim zäutle d’Schwitz erkundet, wosis vorwiegend id Bärge oder ane See het zoge. O Meerluft het üses Zäut mou gschnupperet. Vom Brienzer-, Gänfer-, Sempacher- bis zum Sarnersee über d’Nordsee in Holland zum wäusche Jura u bis is Engadin heimer Zäutplätz u ihri Umgäbige leere kennä.
Dä Summer wei mir ändlich wieder es lengers Abentüür starte u fahre mit eme Camper nach Schottland. Mir, das si die 4 Zwöibeiner obe u d’Vierbeinere unge. Vo ungerwägs brichte mir hie chly vom Entdeckte u Erläbte u näh Öich e so es Stückli mit.