Grau’s u nislig’s Wätter u s’Tagesziu isch geschter scho Durness worde.
E stürmischi Nacht. Räge u Wind peitsche brutau ume Cämper, mitem Rusche vom Meer no im Ohr chönntme glatt seechrank wärde ir immerschoukelnde Alkove obe. Am haubi achti im Duschiblock entdeckt me dases zmingscht e Tür het, um der grob Wind abzhaute u dass s’Warmwasser locker längt. Do luegtme glatt über die ungheizte Rüüm ewäg. D’Sunne drückt dür di graue Wuuche u e Rägeboge kündet besserig fürne fahrfreie Tag a.
Der grau Himu verspricht dasme ufem Morgespaziergang mit em Hung dä riisig Sandstrand für sich eleini het. Aber wehe we d’Sunne chunnt, de göh die hie go bade, egau ob mit Neoprenazug oder nur i de Badhose! Do triffsch Surfer, Familie mit Ching, Jugendliche… eifach aus am u im Wasser… brrrrrr!
S’Wanderwäglinetz in Durness isch super fürne mehrtägige Stop. s’git vo 1.5 km bs 9 km Wanderige entlang de Klippe bis zum üsserschte Punkt, über Moor zu Lochs u sogar entlang de chlynere Bens ir Nöchi u o über fyngsandeti Stränd. S’Büechli mit de Beschribe gits für £1.50 im VisitorCenter u scho geits am nomi los übere „The Meadaidh Walk “ dür’s Hochmoor. D’Strecki wär nur ca. 6.5 km, doch mit em stuune, verwile u fötele si schnäu 3-4 Stung vergange u grad rächtzytig ufe Strandabschnitt chunnt d’Sunne so richtig use. Friedlich liegt die Moorwyti vor üs, mir füele üs gaanz elei uf dere Wäut u gniesses. U de chunnt der Momänt, wo me eifach nume no cha useschreie:
F-R-E-I-H-E-I-T-!
Puberfahrig, d’Kyra fingt die Rüüm chly dunku, si het’s lieber luftig u häu. s’Guiness zum Apéro schmöckt aber i sore umgäbig dopplet guet. Proscht! Am sächsi geit de s’Reschtorand näbedra uf u mir sidle üs um. Einisch nid säuber – Luxus pur!
Ganz touristisch bsueche mir am zwöite fahrfreie Tag d’Smoo Caves, e Höhli wo es chlyses Bächli stetig het i d’Feuse gfrässe. Nach starche Rägefäu chame leider die dritti Chammere via Boot nid bsueche, d’Wanderig über d’Schoofweid bis ad Feuseklippe füre isch aber frei zum gniesse.
U de isches sowyt, ds’HIghland Gathering Durness 2016 startet. Es isch eher e Familiene-Zämekunft, u chly e Mischig zwüsche Sport- u Jugitag, Musik- u Tanzwettbewärb, Schnittersunntig u Highland Games. Mi gseht auerhang u aui Darbietige wärde bewärtet. D’Eierrenne si zum Schiesse, do gits Kategorie vo de chlyne bis zu de gstangne Husfroue, wo mitem Ei ufem Löffu e Strecki abseckle, Dudusackspiler uf de Bünine für d’Seniore u d’Juniore dudle der ganz Tag vor jewils 2 Jurore, di starche Schotterockmanne mit de verschidene Wurfdiszipline schlängge das Gwicht ungerschiedlich wyt i torfig bode hingere, so dass zum Teil ds’Massteam richtig mues uf d’Sitte füchte, Hoch- u Wytsprung u Sackhüpfe wi ou lengere Streckelöuf ums ganze Gländ. A de Foodstäng gits diversi Burger (Rind, Hirsch, Cheese), Kebab, Fisch & Chips, Strawberry-Variatione u o Glace wärde gnosse (o vo üs!), egau wie chaut der Wind isch, wo über’s Gländ fägt.
Bim Chappe u Stirnbang ipacke für id Summerferie hei mir üs doheime no ganz doof gfüeut. Doch bi däm starche Wind schütze die d’Ohre perfekt.
U äbe, gäge Obe schiint de d’Sunne no sooo schön übers Gländ ufe Sandy Beach abe, do blibt niemmer dinne. Aus geit as… is Wasser. Lueget säuber.
Daniel 5. August 2016
Dir heits de interessant:-) …Danke für die tolle Prichte, das ersetzt ja gad es Buech. Merci Göttibueb fürd Charte! hetmi gfröit.
Gniessets no u de bis gli.
LG Dänel
Esther Brack 6. August 2016 — Autor der Seiten
Stöu Dir vor, i hät aus müesse schribe, woni süsch plappere, do wäre die Brichte fasch nümme z’läse 😉