Vo Sunneschyn u Strandspaziergang zrugg on the road!
Bir Reisevorbereitig heimer us angerne Blogs entnoh, dass me sich söu e Mitgliedschaft überlege bi Heritage Scotland, National Trust oder wie die ou immer aui heisse. Natürlich si o mir Mitglied vo Heritage Scotland worde – usem Spargedanke use. Wases üs het brocht? Genau gar nüt. Üses Händli bim usepicke vo de Sehenswürdigkeite, wo mir si go aluege, het gäng vou dernäbe glängt u es isch garantiert irgend e angeri Mitgliedschaft nötig gsi, wome gratis oder viu günschtiger hät ine chönne dermit! Auso Lüttlis, we Dir nid nacheme Büechli vo däm jewilige Mitgliederklub weit reise u vorauem o nid usschliesslich Castles, Ruine u Monuments weit go aluege, de chöit Dir Öich das Gäut spaare u die 3-4 mou der regulär Itritt zahle. Jo richtig, es isch nid grad biuuig hie in Schottland, aber bi üs ir Schwitz isches das ou nid u drum machts gar nid so viu us. U was no besser isch, redet mit de Iheimische, die sägenech nämmlich, wo si ame Wucheändi oder fürne Usflug häre göh, wome gratis ine cha u wome sogar der Hung cha mitnäh. So chunnt me a schöni Plätz mit tolle Sache u ersch no touglich fürnes Familiebüdschee.
Dunrobin Castle is s’nördlichscht glägene „grosse Huus“ vo Schottland. Jojo, ou das isch irgend some angere Trust zueghörig. Mit 189 Zimmer isches s’gröschte i de Highlands u eis vo Britain’s eutischte immer bewohnte „Hüser“ zrugg bis i di früeche 1300er Johr. Es ghört em Duke of Sutherland. Der Itrittspriis het sich aber mehrfach glohnt. Der schotteberockt Herr am Empfang empfiut is zersch hingeruse, abe düre Garte d’Falknereishow go z’luege, när is Museum u düre Park u de zrugg z’cho is „Hus“… hahahaaa, aus ob mir däm Schloss eifach so chönnte Hus säge.
Ir 1stündigi Vorfüehrig über Falknerei gits e riise Mängi Insiderwüsse übere Habicht (Hawk), über d’Üüle (Owl) und übere Fauk (Falcon). Es si aus Waise oder verletzti Roubvögu, wo bim Faukner hie es nöis Deheim überchöme. Sehr fantasievou u gwitzt si d’Methode woner über d’Johre het entwicklet um sine Findlinge s’Flüge u ou s’Jage ir Freiheit bizbringe.
Mit em Museum isch s’Summerhus hingereme „verzouberete“ Gartetor gmeint. Do blibt der s’Muu offe stoh u d’Ouge stuune non-stop. Isch ja ungloublich, was für Jagdtrophäe hie zämecho si. D’Dukes si grossi Jagdfän u wassi nid säuber hei erleit, heisi aus Präsent u Gschänk vo Fründe u Familiene us auer wäut übercho. Au die usgstopfte Tier! vo de iheimische Vögu übere Platibus zum Giraff u Elefant, e Plastik-Nachbiudig vome Wau u no viiiu meh. Aber ou Waffene, Schmuck, Autagsgägeständ u vili Gschtei u geologischi Fundstück wie Pikte etc. vo Schottland, Afrika, Arabie u nahem wie fernem Oschte. Obme wott oder nid, es isch beidruckend!
Im Garte (Park) sisi sit em 2015 am umgstaute u pflege u chöi äuä de wesi hingerus si grad wieder vore afo. D’Rebarbere si der Hammer, d’Kyra chönnt sich grad es Huus drunger boue.
E Lunchpouse isch im Schlosskafi ou für ne Familie erschwinglich u so „diniere“ mir ganz „königlich“ üser Sandwich u Scones with cream!
Viu persönlicher u nöcher ausmers vom Schloss Versailles kenne, isch der Rundgang dür schön zwäggmachti Rüüm im Schloss. Me darf zwar nid fötele, s’Erläbnis isch aber toll. Der deckt Ässtisch für 10 Persone ladt richtig ii zum sich’s fürschtlich lo guet go u grad richtig zum Verdoue fot im Näbezimmer d’Gruppe Fèis Chataibh afo musiziere. Es live „Cèilidh air chuairt“. Meeega schön!
Für d’Aiby isch der Waud u der Strand wo zum Schloss ghöre vorbehaute.
D’Route füehrt üs vo Golspie über Lairg nach Achnairn u vo dört ufere Single Track Road dür einsami Moorlandschafte über Altnaharra und Tongue a feusig Küschtetrack ad North Coast 500 nach Durness. Hättis do nid ändlich ds’viuberedte schottische Wätter empfange, hättemer au die Bens oder Munros (Bärge) ungerwägs mou us der Nöchi gseh.
S’Highland wie’s mues si!
Rhabarberestudene fasch dopplet so höch wie d’Kyra.
Der Falkner mitem kuschelnde Sido.
Der Sido het gärn Ching u drum heimer so noch chönne go fötele.
…posiere ono mit der Kyra.
s’verwunschne Tor wo zum Museum füehrt.
Genau so heimeris das vorgsteut. Düre Nisuräge u Näbu gsehtme eifach d’Bens nid.
Single Track Road nach Altnaharra, grad nume so breit wi üses Huus!
Der Sido würd bi däm Wind energiesparend u lutlos dür d’Lüft sägle.
Üs gfauts u es geit is so richtig guet!
U we de d’Fahrzyt viiu z’läng wird zum no useluege u Idrück ufnäh oder DVD luege, de gseht’s hingerdrinne eso us.
Ah jo, Hei alüte wär mou öppis, aber die funktioniert grad nid.