…längt auso für 4 Persone locker, das isch üsi Bilanz nach 3+ Wuche.
U mi cha das rouende Doheime ou miete. We öpper Interässe het, chöiter über üs der Kontakt vor Daniela (Bsitzerin) afroge.
7 Meter läng, 2,4 Meter breit u 3 Meter höch. S’isch aus do wo mir bruuche u no viu meh. Hie steit üses Deheim ufem superchlyne Platz in Port Appin – e Gheimtipp.
Wo aus zämelouft isch der „Chuchitisch“, do wird zmörgelet, glaferet, glachet, bi chüele oder nasse Temperature gässe, Ichöif härebige u erläse, DVD gluegt, gläse, Blog Iträg gschribe u eifach gsi.
Chuchi isch mit auem igrichtet, wo’s brucht zum leckeri Reisemenüs zoubere u es het gnue Platz für Vorrät.
In Ängland/Schottland wär e Toaster no e gueti Ergänzig u ev. e Wasserchocher, so dasme nam Znacht s’Gas scho cha absteue u de glych no Wasser ufchoche für Kafi oder Tee.
Der gross Chüeuschrank u s’separate Gfrürifach si eidütig top! Jetz ischer fasch läär u mir göh hei. Di zwöi Schäftli obem Chüeuschrank beherbärge Frottée- u Chuchiwösch, Apothek u Diabeteszügs, Laptop u mittlerwile no es paar Fläsche Schottischi Souvenirs!
S’Sofa het meischtens der glych Läser bsetzt, i däm Schäftli obedra hei Spili, Büecher, DVDs, Ladekabu, Cherzli u Latärne, Liechterchetti u Lutsprächer ihre Platz gfunge.
Jedes het es Chleiderschäftli u definitiv z’viu mitgnoh! Der Garderobeschrank dient ou aus Trinkwasserresärveplatz u Hundemateriallager.
Jedes het si eiget Ruum zum Plegere u Pfuuse.
D’Kyra im 2. Stock mit viune Ablagefächli.
Der Patrick im Parterre zäme mit sine Stinksocke u verwuschete Chleider, do chunnt süsch garantiert niemer ine u scho gar nid cho ufruume.
Dört das Töörli im Zwüschebode (1. Stock) zwüsche Patrick u Kyra’s Zimmer isch der Zuegang zume uuuuuu Huuffe Errungeschafte us Schottland. Di grossi Überraschig erläbe mir de doheim, wemers aus uslade u eis Ahaaa-Erläbnis um’s angere hei.
Üses Revier isch z’tags Ablageflächi u znacht Entspannigszone.
Ar Aiby ghört jede Platz wosi sich wou füeut u cha zämerugele zum Pfuuse… ussert Bett u Pouschterflächine! Das isch z’Bourn ufem Golf Platz.
Do blibt no der Thron für privati Audienze mit sich säuber u ds’Brünneli. Di groosszügigi Duschi hei mir aus Hundefueterlager u Dräckwöschsammusteu umgmodlet.
De si dusse no d’Terrasse, d’Apéro-Lounge, der Wintergarte u d’Früschluftzone wes mou würklich stickig wird dinne.
Wi dir gseht, s’isch aus do u mir heis uuuuu gnosse u z’fride gha trotz der Nöchi! Merci viiiiumou Daniela, dass Du üs die Müglichkeit hesch gäh.
Schöön isch’s gsi! U i 450 km si mir doheim!
Mir si am 5. Ouguscht am Obe xung u munter doheim acho, hei ds’Feriedeheim usgruumt u useputzt u am Sunntig mit gfahrne 5020 km abgäh.
Münggu 6. August 2016
häbet e gueti heifahrt !! Isch kuul u ungerhautsam xsi Eui Brichtli z läse :-)!! Top!!
PS: Säg am Ürsu er söu no zersch rassiere befor das er widr chunnt ;-)!! LG u bis gly
Esther Brack 6. August 2016 — Autor der Seiten
Danke. D’Ching heisech dra gwanet unim s okay zum losii gäh. Du gwanisch Di scho o dra