Helvetia & Highlander… passt scho

Vier abentüürlichi Brack’s mit Bikes ungerwägs, off the beaten Tracks! Der 1. Ouguscht, e summerliche Tag, e chlyni inneri Hebride-Insle,  Isle Lismore, d’Fähre wo d’Velo u der Hung gratis mit transportiert isch gwäut. E Burgruine eroberet, es Cappucino mit Schoggichugle im Insukafi gnosse, dür Sumpf, über Müürli u Züün u dür ungwägsams Weidegländ kämpft, paar Schof verschreckt u di Iheimische zum Chopfschüttle brocht, erreiche mir, oder emu der Urs, buechstäblich uf de Fäuge der Fährhafe am Nordändi nach Stunde wieder. Sis äch di tuusig Dischtle gsi, wo der Pnö hei möge oder glych d’Tour der Urs?

Im Pierhouse z’Port Appin e Tag vorhär der Tip vor Wirtin vom chlyne Zäutplatz (5 Steuplätz ohni WC-/Duschiblock, ke Wifi u nüt mit Telefonempfang, das heisi aber nid gseit) mit Strom u Früschwasseraschluss u e Platz wo di nöchschte zwe Nächt frei isch. D’Ussicht u d’Rueh vor Ort überzügt! Us der Reisewärbig chunnt rächtzytig d’Sunne u wüu Sunntig obe isch, spile äned ar Bucht zwe mit em Dudusack es Privatkonzärt zum Apéro. Was wottme meh. Der Fride pur u vor der Nase s’Castle Stalker.

So spartme d’Bootstour für £80, wome das Castle Stalker agäblich vom Wasser us hät chönne go fötele. Okay, d’Seals heimer haut ohni das glych nid gseh. Aber öppis söu me sich jo immer für s’nöchschte mou ufspare.

Wie mir überhoupt do abe si cho? E jooo, dänk miteme Fahrtag wie scho nach Durness ufe. Bire nislige, rägnerische Fahrt uf Single Track Roads über Moor u Hochtäler entlang vo Lochs u sogar über d’Bärge abe. Nid öppe zickzack ufe oder abe wi bi üs, nei, diräkt druf los der Hoger uf u o wieder z’dürab. Für was viu Kurve, s’het gnue Bodewäue wo grad glych effektiv si bim dürerüttle. Nach jedere Ahöchi u vor u nach jedere Kurve gseht d’Gägend grad wieder angersch u no viiiu schöner us, trotz Räge u Nisu. Do muesme eifach x-mou stoppe für ne Foti, da die usem fahrende Fahrzüg ganz klar nid so toll wärde.

Ullapool, es härzigs Fischerdörfli ladt i zume Spaziere u chly lädele u verschnuufe. S’het viu B&Bs wo usbuechet si, isch auso e Stopp wärt.

Grilliere… nach drü erfouglose versüech, Bratwürscht oder Hamburger ufem Grill uf diversi Arte z’brötle, heimeris scho langsam gfrogt, was der Dänel äch a däm Grill so toll fingt. Das Fleisch blibt eifach bleich. 1. Ougusch ohni Grilliere geit würklich nid. E letschte Versuech, probiere mir doch no Wasser iz’füuue bis zu däm max. wo ir Schale igraviert isch… u ändlich brutzelts wie ufeme Grill. Leeeeecker, wie’s muess si! Okay, jetz fingemer ne ou ganz guet.

Hüt isch die letschti Nacht uf Schottischem Bode. Der Camper steit z’Moffat in Südschottland. Aui hei nach 3 Tag ändlich wieder mou duschet, d’Mäge si mitere riise Portion Spaghetti Bolo u Salat gfüut u jetz gits e gmüetliche Fürobe.

Gniesset die letschte Fotine vo üsere Reis, ab morn geits hei zue u das macht üs ke Fröid, drum o kener Brichte u Biuder me!

Nislige, näblige Rägereisetag vo Durness nach Fort William.

Wiudi u einsami Gägende roue verbii.

Hei Bärble u Küsu… lueget mou! Urs u Patrick hei us der Füererkabine churz drufabe ono gseh, was so ä Hirsch ame Outo fürne Schade macht… nid schön, do fahrtsechs die nöchschte Kilometer grad nümme so locker.

Hafe-Hüserzile vo Ullapool

Kyra bim ichoufe vo Ohreglänggeli, wo die Frou säuber het gmacht. Das isch ime Lade für Souvenirs us der Gägend, Gallerie u Kafi (mit 2 Tischli), härzig u persönlich!

Urquart Castle am Loch Ness vom Parkplatz us.

Zmörgele bim Glennfinnan-Viadukt und Dänkmou. Der bescht Parkplatz heimer verwütscht, wüu mir vorem Zmorge do häre si gfahre u ersch hie hei gässe!

U de isch’s cho rägne… wases abe ma! Mir hei däm Wätter trotzet u der Hogwart-Express abgwartet.

D’Rägehose si immerhin einisch zum Isatz cho!

Mit üs zieht ou d’Sunne ufe chly Campingplatz ire Bucht bi Port Appin. s’Rägezügs u d’Badtüechli chöi hie ändlich trochne.

Am haubi nüni starte mir bi strahlendem Sunneschyn es Dog!

Am viertu ab zähni no e Obesunnespaziergang.

D’Morge-Ussicht usem Bett a üsem Troumplatz!

No ganz normau ungerwägs uf der Lismore Isle.

Lismore – fertig teereti Stross.

Aber mou, do düre geit’s zur Ruine sprich Broch (wär aber äue tatsächlich nur e Wanderwäg).

Über Müürli…

…u Züün.

Dür unwägsams Weide-Farn-Gstrüpp-Gländ

Dört isch di Ruine womer göh go erobere u 2-3 glotzendi Schof 😉

U de heimers eroberet das Broch.

Herrlich!

U de d’Rundsicht ab däm grasüberwachsene Steihuuffe abe.

D’Wachfrou bir Ussicht gniesse.

Plegere uf der Muur obe.

U am Obe üser lecker grillierte Steaks u Plätzli mit Stock u Salat u ere feine Äbeeriglace zum Dessär!