Doch no uf u dervo…

…am 14 julliet 2016 ändlich! Grüens Liecht u Awisige was mache im Notfau u wie Fäde säuber zieh (oder de haut zume Arzt oder Tierarzt) u mir si am Zyschtig parat, heimer gmeint. S’het de glych no 2 Tag meh brucht bis ou d’Eurotunnelfahrt het chönne a de nöischte Gegäbeheite apasst wärde u aus Gepäck troche, für doch no gueti 3 Wuche, im Camper verstout isch gsii. Natürlich vots afo rägne womer abfahre u es schiffet o geng wider uf de ganze 443 km bis zur erschte Übernachtig.

Zersch über Dütschland use biege mir Höchi Colmar uf Frankriich i u fahre dür d’Vogese via Nancy bis 50 km südlich vor Reims. In Frankriich gniesse mir Dank em Nationalfiirtag die freii Fahrt uf de lääre Strosse (Felix, mir gratuliere Dir no härzlich zum Geburi u hoffe, Du heigsch Dini Hackfleischbäueli gnosse ☺).

S’coole miteme Hung si natürlich d’Pouse u Spaziergäng absits vor Outobahn. Do entdecktme bedütend meh aus nume Raschtstättene. Nachere ewiglänge Fahrt simer mit paarne Umwäge bi Sunne ufem Campingplatz igfahre.

D’Katie vor Eurotunnel-German-Helpline het die ganzi Umbuechig füre Transport ungerem Kanau düre sehr chundefründlich ghändlet u s’hettis schlussändlich nur grad 35€ Ufpriis koschtet, aber d’Zyte si natürlich nümme nach üsere freie Wau gsi. Das het de so ohni gnaui Planig vorus scho grad chly fürne Schreckmomänt gsorget, womer hei realisiert, dass mir de am Frytig meeega früeh ufmüesse u der Campingplatz eigentlich bis am 7h00 gschlosse isch. Dank Platzwart het ou das klappet.

So simer no im Dunkle losgfahre u hei s’Morgedämmerigsliecht vou miterläbt. Der Näbu isch no über de riisige Französische Fäuder ghanget u derdür heimer die vile Blinkliechter vo de Windreder gseh uftouche. D’Strosse si immer no läär gsi u so simer rächtzytig acho, dasses sogar het ufe Zug 10 Minute früecher glängt.

Pet-Control und Check-in bim Eurotunnel si tiptop organisiert u es het no passt go Cappucinos, Pain-au-Choc u Croissants izchouffe. Fein isch s’Zmorge ungerem Kanau gsi.

Meh aus unplanet heimer de vo Folkestone ono einisch 138 km zrugg gleit. Gstercht im guudige M (üses Reisemenü) heimeris de schlussändlich miteme erschte Inland-Call ufne Golfplatz grettet. Der Patrick stürmt sithär, daser morn hie für £5.00 unbedingt wott Golf spile (u das dörftme für dä Betrag sogar der ganz Tag lang!).

Di lääri Outobahn z’Frankriich

Mir stuune ab de vile riisige Wind-Strom-Alage womer entlang de Outobahne gseh.

Di französischi Bluemewise womer ufeme Aiby-Spaziergang gfunge hei, hettis grad es erschts Cämpingferieschtrüssli bscheert.

Bi schönschter Obesunne u agnähme Temperature gniesse mir es leckers Znacht ufem Camping de Châlons en Champagne u im Aschluss e länge Spaziergang übernes Sportareau.

Am erschte Obe gits gly Fürobe. Aui si müed u es git am 4h00 Tagwach. Jawohl, richtig gläse; u daas i de Ferie!

Bevor mir ufe Eurotunnel-Zug ufgfahre si, heimer no 357 km müesse hingeris bringe, drum dä früeh Tagwach.

Änglische Bode unger de Füess!

Am Strand im Folkstone de dr’Kontakt mit em chaute Meer u de Wäue.

London het der Urs souverän im dichte Verchehr gmeischteret, bis uf zwo Usfahrte, woner wägem no ungwohnte Linksverchehr nid rächtzytig het chönne näh. Dasch vorem Dartford Crossing s’Nadelöhr u einzige Unger-Übergang über Themse im Oschte vor Stadt, weme nid wott zmitz düre Chueche fahre (vo Süde düre Tunnu u vo Norde über d’Brügg). Dasch choschtepflichtig u me cha via Internet bis am nöchschte Tag um 24h00 d’Zahlig online mache – eifach nid vergässe, si si sehr sträng u sueche über d’Gränze use nach de Schuldner.

Mit läärem Akku (am Händi mit de Camping-Mitgliederdate), gstrandet bire Tanksteu, heimer Du vom zwöite Natel per Aruef Hiuf vom Verwalter ufem Bourn Golf Club übercho, wonis het glotset u für nume £15.00 inkl. Strom, 4 Persone und Hung dä toll Platz (s’het nur 5 Steuplätz) diräkt ufem Golfplatz het lo useläse. Do simer jetz fängs mou.