1600 km spöter!

So viu isch üse Superdriver Urs am Stüürrad ghocket, sit mir doheime losgfahre si.

S’erschte Plus in Ängland si di coole Radiosänder, we mou eine chräschlet ab zum nöchschte u scho hetme wieder gueti Musig ir Kabine. Dasch de in Frankriich ganz u gar nid so gsi, dert isch bi zäh Sänder uf nün Gschnorr (natürlich uf Russisch!) u uf eim klassischi Musig cho… totau ätzend für 85%!

Am dritte Fahrtag heimer eigentlich nur max. 2-3 Stung wöue fahre… heis aber de glych uf guet 400 km dürezoge u si, bim dritte Alouf ufeme Campgrund e freie Platz z’übercho, ufem Gländ vom Doe Park grad no ufe letscht frei Pitch ufgfahre… huch, Schwein gha! Jetz wüsse mir, dasses grad s’letschte Weekend ir töifere Priisklass isch u ab em Mäntig d’High-Season afoht… u aui Ängländer das Wucheändi no ihrer Camper u Wohnwäge usfüere.

Di erschti wo uf isch, isch d’Fahrteschriberin… u da d’Morgestund Gold im Mund het, wanderetsi grad mit em Hung über die abgmäite Weide rund um d’Farm. Mit der melodiöse mehrstimmige Hingergrundmusig… „MÄÄÄH – MÄÄÄH“.

Wär seit de mir si nid lernfähig… nam Zmorge isch grad telefonisch der Campingplatz für die nächschte 3 Nächt buechet worde. Auso no ei Tag fahre u de ändlich Pouse u nöime sii.

Der Patrick meint „yes“, das chöimer ou abhööggle, mir (das heisst natürlich d’Mama) hei immerhin einisch der Platz für e Obe scho am morge vorus buechet √; eine vo deheime us bueche heimer ds’Frankriich erlediget √; das mitem im letschte Momänt eine sueche ou √; der letscht frei Platz ufeme Campingplatz übercho ou √; u de natürlich no dä vom Hilfetelefonaruef ufeme Golfplatz, wonis e Platz für nume £15.00 het gäh √!

Fäuder u Hügle entlang der Outobahn z’Nordängland ufem Wäg vom Bourn Golf Club nach Scotland.

Super… bi üs ir Schwitz wär das garantiert scho e Outobahn ohni Pannestreife… hie louffe no Fuessgänger drüber u o d’Riter hei eigeti Chrützige markiert. Sogar Traktore heimer uf der „Outobahn“ überhout!

Doe Park – s’Farmhuus hinge rächts isch usem 17. Johrhundert. D Gaschtgäber si mega fründlich.

Ufem Morgespaziergang mit der Aiby über d’Weide. Di einzelne si mit Steimuure, Hecke oder Züün abtrennt gsi.

Chinderarbeit hüt nam Zmorge! Ou d’Eutere hei mou Ferie… Schlusspunkt!

U de geit’s hüt wyter uf schmale Strössli dür Änglischi Dörfer, über Schoofweide u schlussändlich über d „Scottish Boarder“. Der Patrick gniessts hüt ändlich ou mou vore z’hocke, da me hinge würklich nid e grossi Ussicht het.

Ufem Scenic Trail fahre mir vo Moffat nach Edinburgh dür grüeni Hügle u Houzgebiet im Scottisch Lowland.

Ah jo, do si mir jetz äbe u blibe die nächschte Täg ds’Edinburgh zum Stadt erkunde u sii.

PS: „Für aui wosech froge, wies de mim Buch geit: s’geit tiptop, ha kener Schmärze im Buch, der Darm funktioniert iwandfrei u eigentlich isches nidemou so übu, dass die angere Drü aus erledige ;-). s’Einzige wo mi duurend stört si die picksende Ändi vo de Näifäde u die wirdi morn morge aus erschts los, denn si nämmlich 12 Tag düre!“

Esther