Zersch mou „AUES GUETE ZUM GEBURTSTAG, GROSI“!
Was macht me ganzi vier Tag ime so chlyne u härzige Fischerdörfli mit zwöine Reschtorant, me SPAR ume Goufplatz weme nid Gouf spiut? Usruie u Gniesse u der Strand uf u ab wandere, seckle, spile, ploudere, tröime u si, Wösch wäsche, choche u lecker ässe u ab u zue es Usflügli mache. Es isch so friedlich u mir gniesses aui i voue Züg.
Culloden Battlefield – di letschti Schlacht vo de Schotte, wo d’Ängländer die übermüedete u dür d’Nacht düregwanderete Highlander brutau niedergmetzlet hei. Über 700 Schotte hei uf der Jacobite-Sitte ihres Läbe gloh. Wiviu vor UNION weiss niemer genau. Zwüsche 200 u 300, wobi o uf dere Sitte Schotte mitkämpft hei u gfaue si. Isch e brutali Stimmig uf em Culloden Moor, weme mit dene Informatione drüber louft.
I de dunkle, grüene Wäuder uf der Black Isle erforsche mir schmali Wägli u Tierpfade u gspüre der torfig Moorbode unger üsne Tritte. S’Moos isch wie e luxuriöse weiche Teppich u d’Luft schmöckt schwär u süess.
D’Pfadeler hei grad bewise, dassi o hie öppis z’ässe würde finge. Eierschwümmli am Wäägesrand u zum Dessär Heidubeeri im Waud us zum Schnouse.
No einisch der Rase. Mir hei vilicht scho chly glachet wäge de fliissige Rasemäier hie obe. Aber es git öppis, das finge mir eifach TOP! U das si d’Dog Walks wos überau git, vorauem bi de Campingplätz oder bi Sehenswürdigkeite. Do muesch nid eifach am Strosserand no louffe u der Hung zum schnäue Bisle usfüere. Lueget säuber, was die i de Wiudbluemewise mit de Rasemäier für cooli Wäglilabyrinth frese!
E Busfahrt, wo mou aui d’Ussicht chöi gniesse, es paar Stung in Inverness, d’VISA-Charte um ettlechi Pfung erliechteret u der Cämper het a Gwicht zuegleit. Es wird sortiert, verpackt u vom Urs fachmännisch is Souvenir Lager versorget.
Der Strand: e Troum diräkt vorem rouende Huus. Bi Fluet isch s’Ruusche noch u d’Delphine chöme bis i d’Strandnöchi, grossi Frachtschiff finge der Wäg dür d’Bucht nach Inverness u die chlyne Schiffli i de innere Häfe überchöme wieder Wasser ungere Kiel. Bi Ebbe heimer e riiise länge Platz zum spaziere mit der Aiby u si luegtne aus ihri persönlichi Rennpiste a. Die innere Sitearme vom Moray Firth würke bi Fluet wie Seeä u bi Ebbe sisi läär u vouer Mud.
Zwüsche haubi sibni u achti am morge hetme der gaaaanz läng Strand vom Lüchtturm bis nach Rosemarkie fasch ganz für sich elei. Die Zyt nütze i üsere Familie der Vierbeiner u ei Zwöibeinerin… aui angere passe sich de cämpende Schotte a, wo säute bis nie vor de viertu ab achti afö füregroogge. U grumooret wird de hie nid vor de haubi nüni, we wosch usschlooffe, bisch hie richtig!
Tiptop erhout u miteme sauzige Meerwind no ir Nase tröime mir jetz vom letschte Fürobespaziergang hie u morn geits wyter Richtig Norde.
In Inverness faut eim uf, dass hie no Gälisch gredt wird.
Lean sinn thu, phrionnsa, chun a‘ chuain seo de reidhe is pheilear. We followed you, prince, to this ocean of flatness and bullets.
Hüt isches grüen u blüeht, das Moor mit der bluetige Gschicht.
Für aui Outlander-Fans!
Heiter d’Höchi vo der Türe gseh? Ou d’Highlander si früecher nid so gross gsi.
Black Isle Forest
Högerli uf, Högerli ab.
Brav blibe stoh u hocke für’s Foti!
I chume jo scho zrugg, ha nume müesse go luege, wis nach der Kurve usgseht!
Pfadeler-Dessär!
So fridlich hie!
Fasch wi bi üs a de Quellbächli unge.
Fröidesprüng einisch meh! Es isch meega schön hie u mir müesse de unbedingt wieder mou cho!
Prinzässin Aiby ufem Waud-Thron.
Nomou posiere im Waud!
s’Morgebad im Meer… e Gnuss für d’Aiby aber z’chaut für üs!
Uf der Rennpiste vom Lüchtturm zrugg Richtig Campingplatz und Rosemarkie.
Nöii Hundefründe zum Spile bim Morgespaziergang.
D’Kyra wott usschlooffe, das ghört unbedingt zu de FERIE! Wär wach isch geit ohni Mucks use! So fingeni der igmumelet Urs namm Morgespaziergang mit em Kafi vorem „Huus“.
U de ändlich ischsi wach u es git am haubi zwöufi ZMORGE! Natürlich hets ar Kyra noni glängt für’s alegge, drum im Bischi!
Ar Bushautesteu in Rosemarkie
Wiukomme!
Luschtigi Schiuder… eis wie’s angere.
Shopping in Inverness – d’Stadt näbem Tourismusrummu u mit viu meh richtig schottische Highländer.
Sini Musig het s’warte mit der Aiby vor em Lade usse grad ines Open-Air-Konzärt verwandlet.
Violetti Chiuchetüüre… so cool!
Frachtschiff, wo mit der Fluet vorsichtig ihre Wäg dür d’Firth-Stross sueche.
Dog Walk – die geniau gmäite Wägli für mit de Hüng go e Churzspaziergang mache.
D’Kyra mit der Aiby ufem Dog Walk vor Stross us gseh.
Obespaziergang zum Lüchtturm im Chanonry Park.