Edinburgh brummt!

Flüger wo non-stop lande u starte, Busse u Tram i de Strosse, Dudusack-Musig, schregi Gstaute, Verchleideti, Künstler/Inne u Musiker/Inne überau u LütLütLüt us aune Länder, wome ou häre luegt u lost… weme im Park ufem Rase ligt, gspürtme s’Brumme so richtig. Nam erschte Tag heimer ersch zrugg ufem Campingplatz realisiert, wie lut das die Stadt isch.

Der Campingplatz Caravan Club Silverknowes ligt super am Firth of Forth u vo dört fahrt üs am Morge der Chauffeur mitem Minibus ids Stadtzentrum u am Obe wieder zrugg (am morge 9h30 bis 13h00 im 1/2-Std.-Takt hi u zwüsche 16h30 bis 20h00 äbeso zrugg).

Die erschte Läde heimer bereits bim Ilouffe uf der Princes-Street dürstöberet, derbi het immer eis vo üs mit der Aiby dusse gwartet. Für si isch nid s’Gwimmu der eigentlich Stress sondern, dass immer wieder e Teu vo ihrer Herde i Gasse u Läde verschwindet. Bim Loufe chunntsi vorzueche geng wieder mit der Nase cho abtschegge, dass no aui Bei mit de richtige Gschmäckers umse ume si.

Um e grössere Stadtüberblick u einigermasse e Orientierig z’übercho, entscheide mir üs fürne Open-Deck-Bustour u chouffe es 24-Stunde-Familiebillett. So chöimer a beidne ganze Tage hie je e kompletti Tour mache (mit Hopp off und wieder on) u müesse nid aus abschuene. Das fingt d’Aiby ou super u wott vom erschte Tüürli a geng grad bi de Busse istige, chum steit eine am Trottoirrand u het d’Türe offe.

D’Lüt si meeega Hundefründlich. Überhoupt hets u viu Hüng hie in Schottland u meischtens het der Bsitzer meh aus eine. U es regt sich niemer uf (ussert mir), we d’Aiby fingt, si müessi der Platz ume Camper mit Bäue verteidige. Bim Souvenirlade Romanes & Paterson hettis sogar e Agsteuti ineghout, es sig doch z’wimmlig u z’heiss füre Hung vorem Lade usse, mir söue o ine cho i di klimatisierti Luft u i ha sogar mitere düre ganz Lade dörfe go stöbere, wüusi soooo e Braavi isch gsi. Mir zwo hei der richtig Riicher gha. Natürlich si dört de grad es paar Souvenir mitgloffe… nei Dinu, nid was Du dänksch, mir heise auso zaut!

Am zwöite Tag hie heimer es Parallelprogramm gstartet, da mir am Vortag nur drei vo sächs Fäde säuber hei use brocht. D’Estle isch ab mit em Taxi quer dür d’Stadt zum Edinburgh Royal Infirmary – Notfallstation bim Spital, während die angere Drü mit Hung s’Minibussli id Stadt hei gno u dört die zwöiti grossi Bustour ungernoh hei Richtig Hafe. Dört heisi ar Queen ihri Royali Yacht Britannia wöue go aluege, emu vo usse.

Während am Schriberling der Taxifahrer e huufe Infos über Stadt, Lüt u Läbe hie het gäh umesech über die jewilige Ferie- u Reiseziu het ustuuschet, hei die angere Drü über d’Chopfhörer auerhang zu Gschicht, Technik, Stadtläbe, Royalem, Boute u no viu meh ghört. O d’Stadtteile, womer uf dene zwe Toure het dürfahre si sehr ungerschidlich gsi, e Teil heimer jewils vom Vortag wiedererkennt. Sowou d’Receptionistin vom Spitau wi ou der Taxifahrer hei druf ufmerksam gmacht, dass d’Wartezyte im Spitau sicher duuri u me es guets Buech söu derbi ha. Das hets de gar nid brucht, churz nam Amäude u knapp es sms mitem Stand der Dinge a die Angere schicke isch der Ufruef scho cho für’s Fädezieh u s’Buech isch unantaschtet blibe. Jo die Fäde hätti auso niemer eifach so sich säuber zoge… bi aune dreine si d’Chnüppeli igwachse gsi u die armi Nurse het meega gschwitzt vor Konzentration. Niemer het aber die angere drü mit Hung druf ufmerksam gmacht, dass wesi de bim Britannia-Dock usstiigi, de d’Wartezyt ufe nöchscht Bus chönnti duure. U so het der mega schnäu abgwicklet Spitaubsuech u d’Fahrt im Bus zrugg id Stadt e Vorsprung gäh, das das Buech när im Park näbe der Waverly-Bridge e Stung het chönne gläse wärde.

Faus öpper sich jemous ou überleit mitere no unfadezogne Noht nach Ängland z’reise, Fadezieh hie isch viu eifacher aus i mir das vorgsteut ha u i hätts gar nid ersch müesse säuber versueche. Die hei hie e äxtra Accident and Emergency Abteilig, wo d’Erschtbehandlige u di eifache Fäu mache u me ou ohni Amäudig aus Turischt häre cha. Der Taxifahrer hetmi grad bi däm Igang usegloh u so hani ou nid ersch müesse d’Orientierig überne Info am Houptigang go ihole. U de isch das in Edinburgh im NHS so (so heisst das dört), dass me gar nüt zaut, das o ke Rächnig a d’Versicherig geit u i hane nidemou es Kafi dörfe offeriere, wüusi nüt dörfe anäh… ungloublich aber wohr! Choschte si glich agfaue – Hifahrt vom Campingplatz im Taxi £20.20 u Rückfahrt id Stadt mitem Bus £1.60 = £21.80!

Gnosse heimer hüt bi strahlendem Sunneschyn u blauem Himu ono es PicNic im Park ungerem Riiserad; e Spaziergang zum Shop „Heritage of Scotland“ (isch sicher teune no e Begriff, wo ame bestimmte „Schwitzer-Schottehochzyt“ si gsi); Bsuech vom Grab vom Bobby Grayfriard; Kafi u Cakes ime Gartebeizli bim Grossmarket; Ichouf vo diverse Souvenirs u der Chouf vore Western-Gitarre.

Ufem Campinplatz hets äxtra e Waudbereich abzuunet mit chlyne Wägli chrütz u quer drinne u agschribe mit „Dog-Walk“. Isch gäbig fürne chürzere Spaziergang zum Versübere mit de Hüng. Der Patrick het dört geschter morge früeh mit der Aiby s’Hippi-Gschpängscht entdeckt… jo würklich, im wysse Chleid mit rosarote Blüemli druf u wyssem Hoor! Auso womerse du z’tags hei gseh, isch die Frou blond gsi u het s’Nachthemmli nümme anne gha… grins.

Füre gross Obespaziergang göhmer as Wasser abe (bi Ebbe), damit d’Aiby am Strand cha umedüse u dür ds’Wasser seckle u mir chöi abefahre vom Tageslärm. Isch eifach nume entspannend u schön.

Uf der Open-Deck-Bustour in Edinburgh

Edinburgh Castle – nume Guide-Dogs hei Zuetritt, auso spare mir üs das fürne Städtereis ohni Hung uf!

Schreeg, Schreeger, am Schreegschte!

Über den Dächern von Edinburgh

Musig ide Strosse = Summer!

Der guet Riicher vo üs Zwöine füertis i d’Schlummiabteilig u de finge mir o grad sofort der Favorit.

Feeeeriä!

Royal Yacht Britannia

Jessica – d’Heudin u Rettere vom Tag u eigentlich vo de ganze Ferie. Ohni Fäde geit’s jetz „fadelos“ wyter mit Gniesse ändlich ohni Piickse!

Bim Britannia-Dock am Warte ufe nöchscht Bus zrugg id Stadt.

Uf Wuuche No. 7 am Strahle mit der Western-Gitarre ungerem Arm.

Waas Du wotsch jetz do düre… geit nid, bi grad bequem häregläge.

Spile am Firth of Forth bi Ebbe

Läbesfröid pur – is Meer use u zrugg seckle!

Das isch ar Kyra ihre Lieblingsplatz z’Edinburgh – si sig keis Stadtmeitschi!