…isch daaas schön gsi. Sorry, für’s lange Warte uf Nöis usem Norde 🙂
Ds’Edinburgh het s’Wätter grännet, wo mir abgreiset si u bereits in Falkirk isch d’Sunne wieder cho. „Falkirk Wheel“ isch s’Ziu, dasch e spezielli Schlöise, wo zwe Kanäu verbindet. Der Architekt het aues Rund wöue ha, wasim tatsächlich glunge isch. Falkirk Wheel isch die gröschti, die schneuschti, die gnauschti, die chlynschti, die langsamschti, di schönschti u die einzigi serigi Schlöise, wo no oder überhoupt in Betrieb isch.
E Lunch im Cämper u de geits nordwärts i Cairngorms Nationalpark. Schottischi Bärge (Schwitzer Hügle) e wunderschöni grüeni Wytine mit viune bluemige Farbpunkte vom Strasserand bis sowyt das s’Oug s’erkennt.
Fahrgschichte: Do bruusisch so mit 113 kmh am nöchschte Ziu entgäge u hoppla, hesch e usbrämsende Traktor vor der Schnouze – uf der OUTOBAHN!. ACHTUNG in Inverness, dört isch es Rugbyspiu ir Event-Arena grad näbe der Outobahn agseit u drum wärde d’Fahrer uf ere riisiger Lüchttafele uf die eventuell Stross überquerende Fuessgänger ufmerksam gmacht. E Bousteu vorus wird eeeewig lang mit der rote Ample gsperrt u zwar i beid Richtige – ahaaa, drum duuret das so lang, chum si di grosse dräckhingerlassende Bougfährt wieder uf der Sitte, wird d’Fahrspur grad mit der Reinigungsmaschine hingernoche gsüberet u ersch denn geit d’Fahrt für e augemein Verchehr wyter. Aberdeen – d’Stadt vo de Kreisle! – uf der Schnäustross churz umfahre, damits zügig zrügg id Speyside (Whiskygägend) geit; nüt da, au 500 – 900 Meter chunnt e riise Kreisu u d’Frou GPS erkennt sofort, dasses uf der gwäute Reiseroute Zytverzögerige git.
Auso Daniela, üs nimmt jo wunger, uf was dä Cämper programmiert isch? Eis Ortsschiud mit Dalwhinnie u s’Fahrzüg het wie läts nach links grisse u diräkt die erschti Whisky-Distillerie agstüüret – mir si nid dranne verbi cho! U me seit, das Bärner EuroMobil sig bi diverse Distillerie gsichtet worde. He joo, schliesslich isch dä Wäg ou aus Whisky-Trail usgschiuderet. Söu no eine säge, es gäb gar ke ageborne Orientierigssinn, miir hei uf au Fäu ke Charte u o kei Reisefüehrer bruucht sondern si wie Naturtalänter uf genau die Route cho!
Im Cämper hingerinne z’reise isch nid gaanz so cool. Me gseht nid sehr viu vo der lovely Gägend, wüu s’Fänschter uf der lingge Sitte nur e begränzte Usblick bscheert u uf der rächte Site eher es Guckloch gnennt cha wärde. iPad, Ipod, DVD-Grät u NintendoDS si viu im Isatz, um d’Zyt lo z’verstriche bis zum nöchschte Stopp. Doch weme zwüschine Useluegt, hiuft d’Fantasie mit dene chlyne Usblicke luschtigi Gschichte z’mache.
Wully und Fluffy si zwöi Schof: jo genau, ZWÖI! – zoomemer das Biud mou häre, es Bord miteme Bachgräbli mits dürab, zwöi Schof, wo dört fridlich graase, seit s’einte zum angere: „Hei Wully!“ „Jo Fluffy?“ „Chumm mir spile, mir si gaaanz elei uf dere grüene Wise – oder besser no uf der ganze Wäut“. „Ou cool, jo das mache mir!“ u we’s Wytwinkubiud nimmsch, gsehsch hunderti wyteri Schaf oberhaub, rächts u links vo däm Bördli. U so gsehts do i de Hügle, pardon Bärge, us, Weid um Weid mit tuuuuusige vo Schof, zottligi, wulligi, gschorete; paarne Rinder u mou no es Ross oder zwöi.
Scottie und Flattie: Das Land het garantiert meh Hase aus Müüs! Kyra gseht zum Fänschter us es Häsli zwüsche de Böim. „Jöööö so härzig, so e Scottie wotti, dä nimi hei u s’cha de zu üsne Hase is Gheg“. Patrick hockt denn usnahmswys vor inne u seit „auso die wo ig do vore gseh, si de aus angere aus härzig!“ D’Scotties si die schnuslige chlyne, wo no hüpfe, 3D-Forme hei u Gras frässe u d’Flatties si… hmmm, das überlöh mir jetz öire eigete Fantasie.
Kingussie – e 1-stündigi Wanderig erschiint hie uf der Sitte www.walkinghighlands.co.uk. E erklärti Route entlang em River Gynack fürne Spaziergang mit der Aiby.
Ufem Campingplatz bim Loch Avie ime Birke-Piniewaud gniesse mir e sunnige Obe, grillierti Willadinger Galloway-Hamburger u es Glas Wy u d’Estle isch vou! Nach 5 Wuche Abstinänz bruchts grad 1 ½ dl Wisswy derzue!
Falkirk Wheel – da d’Fahrt ufem Schiff ufe, i Kanau u wieder zrugg e voui Stung duuret, hei nume d’Heufti vo üs die Tour gmacht, während die angere mit der Aiby si umegschuenet.
Okay, dä fahrt immerhin chly schneuer, aus dä wo üs vorhär mou vor Ifahrt här het usbrämset.
Gynack Mill Trail in Kingussie
Zvierihaut – do heimer die erschte einzelne Bites ighout vo de Midges… isch aber no harmlos gsi.
So, jetz heimer mitnech e Rundi gmacht u fahre wyter zum Campingplatz.
Darfi vorsteue – Scottie – mi Name!
Für ne klaari, freii Sicht – Meister Pr… ah nei Brack!