Zersch mou „HAPPY BIRTHDAY CLAUDINE!“
Der sunnig Morge ladt i zure angerhaub stündigi Wanderig (meh ma d’Estle de doch nonid) über’s Dalraddy Moor entlang am Badenoch Way bis nach Kincraig u ufeme angere Wäg wieder zrugg. D’Aiby liebts über die Wiiti z’seckle u muess zwüschine zum Verschnuufe u Pöisele zwunge wärde. Mit der Kamera cha der Patrick d’Roubvögu feschthaute, aber bim Stuune abem grosse Hirsch vergisst är doch glatt ufe Uslöser z’drücke.
U de isches ändlich sowyt; bir Glenlivet Distillerie nähmer are Gratisfüerig mit angerne 8 Touris usem Wallis teil. Hihihii, weme das hätt wöue organisiere, hät das sicher nie klappet. Es steut sich use, das üsi Routewau wättertechnisch klar die besseri isch gsi. Mir hei bis ufs Morgegwitter in Edinburgh immer schön u troche gha, sii jedoch si d’Weschtsite uf cho u hei vorwiegend s’traditionelle schottische Wätter erläbt. Der Jamie, üse Whiskytour-Guide, verzeut üs auerhang über d’Distillerie u verlangt, dass aui Händis u Kameras usgschaute wärde. Mir bsueche ungerwägs Rüümlichkeite wo ä sehr höche Aukohoughaut hei u do längt es Fünkli für’s entzünde. I de Lagerhüser schmöckts sooooo fein, weme dört e ganze Tag würd dinne blibe, wärme mit 3% Aukohou definitiv nümme fahrtouglich!
Angels Share: Während dr lange Lagerzyt reagiert dr Whisky nid nume mit em Fass, sondern verdunschtet ou dür d’Fasswang. Aukohou verdunschtet schnäuer aus Wasser, derdür wird dr Aukohoughaut vome Whisky pro Johr um durchschnittlech 0,5-2% verringeret.
Dr verdunschtend Ateil wird aus „Angels Share“, auso dr Ateil vode Ängu, bezeichnet. es schottisches Sprichwort bhouptet ou, dass d’Schotte kener Problem dermit heige, i Himmu z’cho – si hei ihres Itrittsgäut jo scho lang zaut!
Gluegt, Glost, Gschnupperet, Deguschtiert u Kouft!
Ja hätte mir nume der Campingplatz für hinech o wieder im Vorus buechet. E längi Fahrt dür d’Cairngorms-Bärgwäut bim Lecht Schiigebiet verbi u z’dürab bis ad Küschte nach Stonehaven. Der Campingplatz diräkt am Strandwäg isch usbuechet u mir müesse wyterfahre o weme nümme mag. Einisch meh steut sich’s use, dass immer denn, we mir ufem usgwäute oder Erschtwauplatz nid häre chöi, der Camper eifach nume troumhaft u perfekt steit fürne Nacht Erholig!
Badenach Way über’s Dalraddy Moore – ei riisigi Weid.
Wägwyser
Bis uf zwöi Schof gseh mir kener Weidetier hie (okay, ussert d’Scotties!)…
…aber mir hei usegfunge, wosi düre ab si 😉
Kyra brucht dringend e Sterchig u ässe geit nid bim Louffe, paschta!
Do git’s nid viu z’säge. Glenlivet Distillerie!
Wo die drü Fesser stöh, hets viiiiiu „Angel Share“ ir Luft. Isch das lecker gsi dört inne.
Wer die Wahl hat, hat die Qual! Unger zwe Fläsche het der Urs sich nid chönne entscheide. Probiert hei zwöi (u zwar nid d’Ching) u eis vo üs isch riiiichtig duslig gsi när!
Dasch auso nid e Whisky-Halluzination, dasch würklich dört gstange! Ufem Pass vom Lecht-Skigebiet.
Ir nöchi vom Balmoral Castle simer du über die Brügg us de Bärge obe abe cho. Chrütze unmüglich u weme dört druffe es Foto macht, während öpper wott drüber fahre, söttme s’Füdle zimlich izieh.
E Gruess für Anina & Dinu!
Der chly günschtig Campingplatz diräkt am Meer z’Inverbervie.
I bi sooo müed gsi, dasi trotz däm Wätter bi go lige u bis am angere morge ha chönne pfuuse, während der Urs u d’Ching si am Strand gsi, hei gspiut, znachtkochet u s’schöne Wätter u der Obe gnosse.
Steimannli boue u Fötele am Strand.
Wäue Studium vor Kyra.