Usgschlooffe, wieder fit u der Mage mit em Zmorge versorget geit’s ab zur erschte antike Steihuuffebesichtigung!
Dunnottar Castle – sehr iidrücklich, wie si die Feschtig uf däm praktisch uninnähmbare Feuse hei erboue. Wie das em William Wallace mit sire untrenierte Burearmee glunge isch, dört ufe z’cho, das blibt sis Gheimnis. D’Vorstellig, daser d’Kapäue hie vouer änglischer Soudate het i Brand gsteckt isch scho chly brutau!
Der Parkplatziwyser isch Richter bi de Hündeler u het säuber Belgischi Schäfer, är isch sehr ar Aiby interessiert u wott de Mudi go google. Nacheme Schwatz zieht’s üs zrugg id Speyside.
Fassbinderei, das isch eine vo de drü eutischte hüt no praktizierte Brüef, womer bi Speyside Cooperage vorgsteut überchöme. Dank däm, dass e 4chöpfigi Truppe nid rächtzytig vor Ort isch heimer no grad Platz ir letschte Füerig. Hie sisi vorauem uf Überhole vo bereits bruchte Fässer spezialisiert. Es Fass het e Läbesduur vo ca. 60 Johr, das heisst, vier mou e 15jährige Whisky. Di meischte Fässer wosi überhole chöme us Amerika, s’si Eichefässer wo meischtens vorhär Wy drinne glageret isch gsi. Fürnes Fass foht aus mitere einzige Eichle a u bis die do häre chöme, zeue die guet mou 100 Johr. D’Fassbinder schaffe im Akkord, s’geit zackzack! Si wärde nach Azau Fässer pro Tag zaut. Ir ganze Firma isch nur eis nid e Schott, sondern e Ungaar, aber das isch kes Problem, dä Bruef wird überau glych usgüebt.
D’Fassbinderei ligt in Craigellachie u mir stüüre im Aschluss der Campingplatz wo i 2 Meile Distanz söu sii a. D’Fahrt füert über Fäud u düre Waud uf eme schmale Strössli u hei, lueg jetz „Aberlour Gardens“ heisst dä Campingplatz… das ischne! Während d’Ching game u chille entdecke Urs u Estle ufem angerhaubstündige Spaziergang mit der Aiby so auerhand. Verbi are Farm über Fäuder u dür dunkli Wäudli lande mir am Dorfrand vo Aberlour. Na dases hie nöime Whisky git, muesis niemer verzeue! Aber was es do ono git, das verratemer ersch i de Föteli!
Uf de Muurgäng.
Erforsche vo aute Gmüür…
Überblick über Volk und Gesindel!
Hoi Zäme!
Ah jo, mir ghöre im Fau zäme, o wes uf de Fotis meischtens nid Beidi druf het!
Uf der Fahrt zur Fassbinderei hetsechs du zeigt, s’schottische Wätter! Zersch e dunkli Wang u när dä Rägevorhang u scho hei d’Schibewüscher soumässig viu z’tüe gha.
Speyside Cooperage – so gseht’s us i dere Wärchstadt. Hinge gsehtme d’Lehrlingsarbeitsplätz.
Bi dere Chüuche schmöckts nach Niidletäfeli! Isch ke Witz u nei, es si nid d’Liiche!
Ufem Aibyspaziergang simer vor Chüuche us der Nase noche dür das Wägli u der Gschmack vo süesser Vanilla isch derzue cho.
Nei mir heis nid gwüsst, aber e findigi Diabetikernase chunnt jedem Dorfgheimnis uf d’Spuur. Walker Shortbread si o in Aberlour doheime! Kennsch Fabriklade Kambly?