Ussicht uf 3 Tag am glyche Ort!

Gmüetlich chöme mir am Samschtig morge i d’Gäng u nusche üs chly z’rächt, bevor’s wieder los geit.

Ufem Platz vis-a-vis isch e Schottischi Familie us Elgin, wo für’s Wucheändi mit em Wohnwage di 30 Minute do ufe gfahre isch. Si statte üs mit Insidertips us für e hütig Tag. Schöni Küschtestrecki vo Lossiemouth nach Hopeman, Delphine wome vilicht vom Strand us gseht, s’beschte Ice Cream in Hopeman, Castle Duffus wo „free“ sig u mit em Hung cha bsuecht wärde u natürlich der Lüchtturm vo Elgin. Der vorgschlagnig Wäg wird unger d’Reder gnoh u d’Hautesteue nach Luscht u Luune für üs apasst u usdehnt.

Für die erschte Programmteile heimer auerdings für einisch nid so wyt… genau, Walker Shortbread Fabriklade u Aberlour Distillery.

Stop, Shop and Go!

Kyra meint: „Jetz heiter de würklich gnue Whisky kouft!“ Cha aber nid viu säge, da si sich o grad bi Walker’s ustobet het ;-).

Näbem Golfspile muess de Schotte ires liebschte Hobby eidütig RASEMÄIE si!!! Aui Rändli, Wägli, Plätz, Rase u Parks si früsch gmäit, wärde grad gmäit oder gseh vor churzem gmäit us. Überhoupt… Campingrase isch o chly heilig… chum zieht öpper nach 2-3 Tag wyter, wird grad der Rasebitz nochegmäit oder teune Orte muesch au Tag der Campingteppich am morge ufroue u darfschne am Obe wieder usroue, so dases gar kener grosse Fläre gäubi Flächi git 😀

Ufem Rosemarkie Caravan Park heimer scho vor zwe Tag für die nöchschte 3 Nächt buechet, da mir mou e Pouse vom Reise bruche. Das isch auso z’Tagesziu u aus wytere entnäht Dir de fougende Fötelis. Genau richtig für üses Sunntigsprogramm isches bis i nami ine schön u troche gsi u jetz fürne fule Obe e richtig schottische Räge. Aaaah, eifach nüt mache!

Bis s’Zmorge parat isch, ungernäh die zwöi no e churze Spaziergang.

Daniela, dis Fahrzüg isch auso o hie ufgfaue, grad unmittubar näbem Igang, ufeme z’churze Parkplatz u mitere beuteriiche Bande a Bord! Der Urs het vou zuegschlage bi de dunkle Schoggi-Shortbread… u ersch bim Schnouse gmerkt, dass si mit Chilli drinn si 😀

Next Stop! D’Ching warte im Cämper, Zuetritt nume für Ü18!

Im Hafe vo Hopeman isch e usdehnte Strandbsuech vorgseh.

Lunch-Time on the Beach!

Ändlich: Fish & Chips!

Brrr, bi ig froh, hei mir d’Ärzt Badeverbot gäh!

Umetoobe bis zum Uschotze… gäu Patrick! s’het grad chly gnue Sauz im Wasser 😉

Luftsprüng!

Wiso het äch der Urs hie freiwiuig nach der Kamera griffe??? Chly wasserschüch?

Best Ice Creams in Hopeman!

Chiubifahrt for FREE!

z’Nacht am viertu vor Eufi isch immer no so häu, dasme ohni Blitz cha fötele.

Logisch hei mir es Schlafmanggo, chöme mir doch ersch wes dunklet is Näscht. U am haubi vieri isches schowider am tage.

Hüt isch Sunntig, do heissts ruuie u chille us vou gmüetlich näh! Mir spaziere am morge 25 Minute zu däm Lüchtturm füre.

Do lömeris mit paarne Angere am Strand nider u warte uf di inewäuendi Fluet wo d’Salmons bringe.

Was s’Fueter isch für die do. Freii Delphine us nöchschter Nöchi vom Land us beobachte. Eifach nume schön!

Mir hoffe, Dir heit paar schöni Iblicke i üsi Erläbnis vode letschte 5 Tage übercho. Und Tschüss!